• Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
  • Myanma Timber Enterprise
Previous Next

ပြည်ထောင်စုဝန်ကြီး ဦးဝင်းထွန်း၏ နှုတ်ခွန်းဆက် အမှာစကား

အားလုံးသိရှိပြီးဖြစ်တဲ့အတိုင်းဒီကနေ့ ကျင်းပတဲ့အခမ်းအနားဟာ နိုင်ငံပိုင်စီးပွားရေး အဖွဲ့အစည်း (State Owned Enterprise) တစ်ခုဖြစ်တဲ့ မြန်မာ့သစ်လုပ်ငန်းကို လွတ်လပ်သော စီးပွားရေးကော်ပိုရေးရှင်းအဖြစ် ပြောင်းလဲဖွဲ့စည်းခြင်း (Corporatization)နဲ့ပတ်သက်ပြီး တွေ့ဆုံဆွေးနွေးတဲ့ အခမ်းအနားဖြစ်ပါတယ်။ တစ်နည်းအားဖြင့် ဖွဲ့စည်းပုံအခြေခံဥပဒေနဲ့အညီ နိုင်ငံတော်ရဲ့ စီးပွားရေးကို စျေးကွက်စီးပွားရေးစနစ်သို့ ပြုပြင်ပြောင်းလဲရာမှာ အခြေခံကျတဲ့ စီးပွားရေးပြုပြင်ပြောင်းလဲမှု ဖော်ဆောင်ရေးလုပ်ငန်းစဉ်ကို အကောင်အထည်ဖော်ခြင်းဖြစ်သလို မြန်မာ့သစ်လုပ်ငန်းရဲ့ သမိုင်းအလှည့်အပြောင်းလို့ ဆိုရမှာဖြစ်ပါတယ်။ မည်သည့်အဖွဲ့အစည်း မဆို ပြုပြင်ပြောင်းလဲမှုကိုဖော်ဆောင်ရာမှာ အဖွဲ့အစည်းအတွင်းမှာရှိတဲ့ အဖွဲ့ဝင်များဟာ အဓိကအကျဆုံး (Stakeholder) များဖြစ်ပါတယ်။ (No chain is stronger than its weakest link) ဆိုတဲ့ စကားလိုပဲ၊ အဖွဲ့အစည်းအတွင်းမှာရှိတဲ့ အဖွဲ့ဝင်များရဲ့ စွမ်းဆောင်ရည် ရှိမှုသည်သာ အဖွဲ့အစည်းရဲ့ ခိုင်မာတောင့်တင်းမှု အခြေခံဖြစ်ပါတယ်။ ဒါကြောင့်မို့ ဒီကနေ့ အခမ်းအနားမှာ ဝန်ကြီးဌာနလက်အောက်မှာရှိတဲ့ ဌာနအသီးသီးမှ တာဝန်ရှိသူများ၊ အထူးသဖြင့် မြန်မာ့သစ်လုပ်ငန်းမှ အရာထမ်းအများစုကို အခုလို တွေ့ဆုံ ဆွေးနွေးမှာကြားခွင့် ရရှိခြင်းနဲ့ အတွေ့အကြုံဗဟုသုတ လွန်စွာကြွယ်ဝသော ဆရာကြီး ဒေါက်တာ အောင်ထွန်းသက် ရဲ့ အသိပညာမျှတဖြန့်ဝေပေးမှုကို နာယူမှတ်သားခွင့်ရရှိစေခြင်းတို့အတွက် အထူးဘဲ ဝမ်းသာ ပီတိဖြစ်ရပါတယ်။

ကမ္ဘာ့နိုင်ငံအသီးသီးဟာ နိုင်ငံဖွံ့ဖြိုးတိုးတက်ရေးအတွက် ပြုပြင်ပြောင်းလဲမှုများကို ဆောင်ရွက်ကြသလို မြန်မာနိုင်ငံအနေနဲ့လည်း အစိုးရသစ်လက်ထက်မှာ နိုင်ငံရေးပြုပြင် ပြောင်းလဲမှု၊    စီးပွားရေးနှင့်    လူမှုရေးပြုပြင်ပြောင်းလဲမှု၊    အုပ်ချုပ်ရေးပြုပြင်ပြောင်းလဲမှုနှင့် ပုဂ္ဂလိကကဏ္ဍဖွံ့ဖြိုး တိုးတက်ရေးပြုပြင်ပြောင်းလဲမှု လုပ်ငန်းစဉ်များကို အဆင့်ဆင့် ဆောင်ရွက် လျက်ရှိပါတယ်။ ယနေ့ကျင်းပတဲ့ အခမ်းအနားဟာ စီးပွားရေးပြုပြင် ပြောင်းလဲမှုလုပ်ငန်းစဉ်နဲ့ ဆက်စပ်ပတ်သက်တဲ့အခမ်းအနားဖြစ်ပါတယ်။

ကမ္ဘာ့နိုင်ငံအသီးသီးရဲ့ စီးပွားရေးပြုပြင်ပြောင်းလဲမှုများကို လေ့လာကြည့်မယ်ဆိုရင် ဒုတိယကမ္ဘာစစ်အပြီးမှာ နိုင်ငံအစိုးရများဟာ ပြည်သူများအတွက်အဓိကကျသော ထုတ်ကုန်နှင့် ဝန်ဆောင်မှုများကို အဆင်ပြေချောမွေ့စွာ ဖြည့်ဆည်းပေးရေးဦးတည်ချက်နဲ့ နိုင်ငံပိုင် လုပ်ငန်းများထူထောင်ခြင်း (State ownership) နှင့် ထိန်းချုပ်ကွပ်ကဲခြင်း (Regulation) ကို ဆောင်ရွက်ခဲ့ကြပါတယ်။၁၉၇၀ခုနှစ်နောက်ပိုင်းမှာတော့ နိုင်ငံပိုင်လုပ်ငန်းများရဲ့စွမ်းဆောင်ရည် အားနည်းမှုကို သတိပြုမိလာခြင်း၊ အစိုးရရဲ့ဘတ်ဂျက်လိုငွေနဲ့ ကြွေးမြီများ မြင့်တက်လာခြင်း၊ ကမ္ဘာ့ငွေကြေးစျေးကွက်တွင် ကမ္ဘာလုံးဆိုင်ရာလွှမ်းခြုံမှု (Globalization) ဖြစ်ပေါ်လာခြင်း၊ နည်းပညာများပြောင်းလဲတိုးတက်လာခြင်းနဲ့ Ideological shift လို့ ခေါ်တဲ့ နိုင်ငံရေးဆိုင်ရာ အတွေးအခေါ်ပြောင်းလဲမှုကြောင့် Transition Economy လို့ခေါ်တဲ့ စီးပွားရေးစနစ်များ ပြောင်းလဲလာခြင်းတို့ ပေါ်ပေါက်လာခဲ့ပါတယ်။ ဒီအချက်တွေဟာ နိုင်ငံပိုင်စီးပွားရေးလုပ်ငန်း များကို စီးပွားရေးဆန်ဆန် လုပ်ကိုင်နိုင်ဖို့အတွက် Privatization လို့ခေါ်တဲ့ ပုဂ္ဂလိကသို့ လွှဲပြောင်းခြင်းလုပ်ငန်းစဉ်ကို ဦးတည်စေခဲ့ကြောင်း လေ့လာတွေ့ရှိရပါတယ်။

Corporatization လုပ်ငန်းစဉ်ဟာ Privatization လုပ်ငန်းစဉ်ဖော်ဆောင်ရာမှာ ခရီး တစ်ထောက်နားခိုရာဖြစ်တယ်လို့ လေ့လာသိရှိရပါတယ်။ ကမ္ဘာ့နိုင်ငံအသီးသီးဟာ သက်ဆိုင်ရာ နိုင်ငံရဲ့ ရေ မြေ သဘာဝ နဲ့ အခြားသော အခြေခံအချက်များအပေါ်မူတည်ပြီး ပြုပြင်ပြောင်းလဲ ရေးကို ဆောင်ရွက်ကြရမှာ ကောင်းမွန်တဲ့အတွေ့အကြုံများရှိသလို လွဲမှားတဲ့ အခြေအနေများ ကိုလည်း သင်ခန်းစာအဖြစ် လေ့လာတွေ့ရှိရပါတယ်။ မြန်မာနိုင်ငံရဲ့ ပြုပြင်ပြောင်းလဲရေး လုပ်ငန်းစဉ်များကို     အကောင်အထည်ဖော်တဲ့နေရာမှာ     အခြားနိုင်ငံများရဲ့     အတွေ့အကြုံ သင်ခန်းစာများ နမူနာယူခြင်းဖြင့် ပြဿနာအခက်အခဲများကို ရှောင်ရှားနိုင်ပြီး Late Comer’s Advantage ကို ရရှိနိုင်မှာ ဖြစ်ပါတယ်။

အရေးကြီးတဲ့အချက်အနေနဲ့ ယခုအကောင်အထည်ဖော်ဆောင်ရွက်မယ့်Corporatization လုပ်ငန်းစဉ်ဟာ ဘယ်လိုမှ ရှောင်လွဲလို့မရတဲ့၊ မဖြစ်မနေအကောင်အထည်ဖော်ဆောင်ရွက်ရမယ့် လုပ်ငန်းစဉ်ဖြစ်ကြောင်း  ဆွေးနွေးပြောကြားလိုပါတယ်။  ဒီလို အကောင်အထည်ဖော်ဆောင်ရွက်တဲ့နေရာမှာ မြန်မာ့သစ်လုပ်ငန်းကို အခေါ်အဝေါ်အမည်ပညတ်ဝေါဟာရအရဖြစ်စေ၊ အသွင် သဏ္ဌာန်အရဖြစ်စေ၊ ပြောင်းလဲရုံနဲ့ ရည်မှန်းချက်ပေါက်မြောက်သွားမှာ မဟုတ်ပါဘူး။ သက်ဆိုင်ရာအဖွဲ့အစည်းဝင် အရာထမ်း၊ အမှုထမ်းများရဲ့ (Mind Set) ကို ပြောင်းလဲရမှာ ဖြစ်ပါတယ်။ အလားတူပြောင်းလဲပေါ်ပေါက်လာမယ့် ကော်ပိုရေးရှင်းရဲ့ ဖွဲ့စည်းတည်ဆောက်ပုံ၊ လုပ်နည်းလုပ်စဉ်၊ အုပ်ချုပ်မှုစနစ် အစရှိတဲ့ (Corporate Governance) လို့ခေါ်တဲ့ စီးပွားရေး လုပ်ငန်းကြီးများ စီမံအုပ်ချုပ်မှုစနစ်ကို နားလည်တတ်ကျွမ်းအောင် လေ့လာသင်ယူသွားဖို့ မိမိတို့ရဲ့စွမ်းဆောင်ရည်များကို မြှင့်တင်ဖို့ အထူးအရေးကြီးမှာဖြစ်ကြောင်း မှာကြားလိုပါတယ်။

ဒီကနေ့အခမ်းအနားမှာ စီးပွားရေးအကြံပေးပုဂ္ဂိုလ်ဆရာကြီး ဒေါက်တာအောင်ထွန်းသက် ရဲ့ ဆွေးနွေးဟောပြောမှုကို အခြေခံပြီး မြန်မာ့သစ်လုပ်ငန်းရဲ့ ပြုပြင်ပြောင်းလဲမှုကို စနစ်တကျ အကောင်အထည်ဖော်ဆောင်ရွက်ခြင်းဖြင့် နိုင်ငံတော်အစိုးရသစ်ရဲ့ စီးပွားရေးပြုပြင် ပြောင်းလဲမှုလုပ်ငန်းစဉ်မှာ အောင်မြင်တဲ့ နမူနာကောင်းတစ်ခု (Flagship) တစ်ခုအဖြစ် မြင်တွေ့ လိုပါကြောင်းနဲ့ အောင်မြင်အောင် ဆောင်ရွက်ကြဖို့ တိုက်တွန်းပါကြောင်း အလေးအနက် ပြောကြားလိုပါတယ်။

နိဂုံးချုပ်အနေနဲ့ ပြောင်းလဲခြင်း (Change) ဆိုတာ ရှောင်လွှဲလို့မရတဲ့ သဘာဝ တရားဖြစ်ပါတယ်။ လောကမှာ ဘယ်တော့မှ မပြောင်းလဲတဲ့အရာတစ်ခုပဲရှိပါတယ်။ ဒါဟာ ပြောင်းလဲခြင်းပါဘဲ။ ပြောင်းလဲခြင်းကို စနစ်တကျ စီမံခန့်ခွဲနိုင်မှသာ ရှင်သန်ရပ်တည်နိုင် မှာဖြစ်ပါတယ်။ ဒါကြောင့်မို့ အပြောင်းအလဲကို ရင်ဆိုင်တဲ့အခါမှာ အခက်အခဲတစ်ရပ်၊ ပြဿနာတစ်ရပ်အနေနဲ့ မမြင်ဘဲ အခွင့်အလမ်းတစ်ရပ်အနေနဲ့ ရှုမြင်သုံးသပ်ပြီး ကြိုးပမ်း အကောင်အထည်ဖော်သွားကြပါလို့ တိုက်တွန်းလိုပါတယ်။

အထူးသဖြင့် ဒီကနေ့အခမ်းအနားမှာ အလုပ်တာဝန်များ မအားလပ်တဲ့ကြားက လာရောက်ပြီး ညွှန်ကြားပြသပေးပါသော ဆရာကြီး ဒေါက်တာအောင်ထွန်းသက်ကို အထူး ကျေးဇူးဥပကာရတင်ရှိပါကြောင်းနဲ့ မြန်မာ့သစ်လုပ်ငန်းရဲ့ Corporatization လုပ်ငန်းစဉ်များ အောင်မြင်ရေးအတွက် ဆက်လက်လမ်းညွှန်မှု ပြုပေးပါရန်ပန်ကြားပါကြောင်းပြောကြားရင်း နိဂုံးချုပ်အပ်ပါတယ်။

Leave your comments

Post comment as a guest

0
terms and condition.

Comments

  • No comments found
© 2017   Myanma Timber Enterprise. All Rights Reserved.